Italiyaning «Roma» klubi mavsum oldi tayyorgarlik uchrashuvida Ispaniyaning «Betis» jamoasiga qarshi bahs olib bordi.

Uchrashuvning 4-daqiqasida mezbonlar futbolchisi Rodri Sanches «Betis»ni hisobda oldinga olib chiqdi.

Bahsning 27-daqiqasida Eldor Shomurodov o‘zining debyut uchrashuvidayoq raqib darvozasiga chiroyli gol kiritdi.

Oradan ko‘p o‘tmay Nabil Fekir «Betis»ning navbatdagi golini yo‘lladi.

Ikkinchi bo‘lim boshida rimliklar burchak to‘pidan keyin muvozanatni tiklashdi. Uzatilgan to‘pga Shomurodov hammadan birinchi sakrab boshi bilan zarba berdi. Zarbasidan darvoza to‘siniga tegib qaytgan to‘pni Janluka Manchini bo‘sh darvozaga joylab qo‘ydi.

Biroz vaqt o‘tib maydonda kam kuzatiladigan holat ro‘y berdi. Ketma-ket «Roma»ning uch vakili qizil kartochka olib, maydondan haydaldi. Orada rimliklar ustozi Joze Mourinoga ham qizil kartochka berildi.

Shomurodov 67-daqiqada zaxiraga olindi, uning o‘rniga majburiy tarzda himoyachi tushirildi. Kamchilik bo‘lib qolgan rimliklar darvozasi esa ketma-ket nishonga olindi va «Roma» yirik hisobda mag‘lub bo‘ldi.

«Betis» Ispaniya — «Roma» Italiya 5:2

Gollar: 1:0 – 4 Rodri, 1:1 – 27 Shomurodov, 2:1 – 30 Fekir, 2:2 – 51 Manchini, 3:2 – 58 Moreno, 4:2 – 80 Telyo, 5:2 – 83 Gonsales.

«Betis»: Ruy Silva, Moreno, Ruis, Sabali (Montoyya, 17), Edgar Gonsales, Rodri (Vilyam Karvalyu, 72), Kanales (Guardado, 52), Ruibal (Xoakin, 73), Akuoku (Gonsales, 72), Fekir, Iglesias (Telyo, 73).

«Roma»: Ruy Patrisiu (Fuzato, 70), Manchini, Smolling (Rojer, 46), Kalafyori, Karsdorp, Pellegrini, Diavara (Veretu, 46), Mxitaryan (ash-Shaaravi, 46), Kristante (Bove, 46), Zaniolo (Karles Peres, 63), Shomurodov (Kumbula, 67).

Ogohlantirishlar: Karsdorp (12), Pellegrini (37), Mxitaryan (41), Zaniolo (53), Manchini (58).

Chetlatishlar: Pellegrini (59), Manchini (65), Karsdorp (78).