Joriy yilda Qoraqalpog‘iston Respublikasi, viloyatlar va Toshkent shahrida o‘g‘il bolalar o‘rtasida futbol va mini-futbol hamda ilk marotaba qizlar o‘rtasida mini-futbol bo‘yicha DXX kubogi musobaqalari ikki bosqichda o‘tkazildi va Respublika bosqichiga yetib keldi.

Birinchi bosqich – tuman/shaharlar kesimida aprel-may oylarida, ikkinchi bosqich – Qoraqalpog‘iston Respublikasi, viloyatlar va Toshkent shahri miqyosida iyun-iyul oylarida o‘tkazildi.

Bu yilgi DXX kubogi musobaqalari respublika bo‘yicha 250 ming nafardan ortiq yoshlarni qamrab oldi.

Ikkinchi bosqich yakuni bo‘yicha 365 nafar iqtidorli yoshlar aniqlanib, hozirda ularni mahalliy futbol klublariga jalb qilish choralari ko‘rilmoqda.

Turnirning Respublika bosqichi 21-25 avgust kunlari «Bunyodkor» futbol akademiyasi maydonlarida, final o‘yini esa 26 avgust kuni «Jar» stadionida o‘tkaziladi. Unda 42 ta jamoa g‘oliblik uchun kurash olib boradi.

Respublika bosqichida o‘g‘il bolalar o‘rtasida futbol va mini-futbol bo‘yicha g‘olib bo‘lgan jamoalar mahallasiga mini-futbol maydoni, 2-o‘rinni egallagan jamoalar uchun universal sport maydoni (basketbol va voleybol o‘yinlari uchun mo‘ljallangan), 3-o‘rinni egallagan jamoalar mahallasiga «Stritbol» (bir savatli ko‘cha basketboli) sport maydoni qurib beriladi.

Qizlar musobaqasida g‘olib va sovrindor bo‘lgan jamoalar pul mukofoti bilan taqdirlanadi.