Shavkat Mirziyoyev 3 mart kuni Bolgariya prezidenti Rumen Radev va butun Bolgariya xalqini ushbu mamlakatning milliy bayrami — Bolgariya xalos etilgan kun bilan tabrikladi. Bu haqda O‘zbekiston Respublikasi Prezidentining matbuot xizmati xabar berdi.

Eslatib o‘tamiz, Bolgariya birinchilardan bo‘lib, ya’ni 1992-yilning 6-yanvarida O‘zbekistonning mustaqilligini tan olgan davlatlardan biridir. 1992-yilning 13-sentyabr kuni O‘zbekiston va Bolgariya o‘rtasida diplomatik munosabatlar o‘rnatilgan.

O‘zbekiston Prezidenti Shavkat Mirziyoyev 2017-yilning 20-sentyabr kuni Nyu-Yorkda bolgariyalik hamkasbi Rumen Radev bilan uchrashgan edi. Oliy darajadagi mazkur uchrashuvda O‘zbekiston – Bolgariya munosabatlarining bugungi holati va istiqbollari muhokama qilingan, Rumen Radev Bolgariya Shavkat Mirziyoyev rahbarligida O‘zbekiston iqtisodiyotini rivojlantirishga qaratilgan islohotlarni, Markaziy Osiyoda davlatlararo muloqotni mustahkamlash bo‘yicha amalga oshirilayotgan sa’y-harakatlarni qadrlashini ta’kidlagandi. 

Mavzkur uchrashuvda Shavkat Mirziyoyev Bolgariya prezidentini o‘zi uchun qulay vaqtda O‘zbekistonga tashrif buyurishga taklif etgan edi.