O‘zbekiston prezidenti yordamchisi Saida Mirziyoyeva Amerikaning O‘zbekistondagi elchisi bilan AQShga bo‘lajak tashrif masalalarini muhokama qildi.

Suhbat chog‘ida O‘zbekiston—AQSh hamkorligiga oid dolzarb masalalar, o‘zaro munosabatlarni yana kengaytirish istiqbollari yuzasidan fikr almashilgan. Elchi AQSh mamlakat mustaqilligi, hududiy yaxlitligi va suverenitetiga sodiqligini tasdiqladi.

“Bugun AQShning O‘zbekistondagi elchisi Jonatan Xenik bilan uchrashdik. Suhbat chog‘ida O‘zbekiston—AQSh hamkorligiga oid dolzarb masalalar, o‘zaro munosabatlarni yana kengaytirish istiqbollari yuzasidan fikr almashdik. 

Shuningdek, joriy yilning sentyabr oyida O‘zbekiston delegatsiyasining AQShga bo‘lajak tashrifi bilan bog‘liq masalalarni muhokama qildik. 

Amerika tomoni O‘zbekistonda amalga oshirilayotgan islohotlarni qo‘llab-quvvatlashi, iqtisodiyot, ta’lim, sog‘liqni saqlash kabi turli sohalarda aloqalarni yanada chuqurlashtirishdan o‘zaro manfaatdor ekanligini bildirib, AQSh mamlakatimiz mustaqilligi, hududiy yaxlitligi va suverenitetiga sodiqligini tasdiqladi”, — deydi Saida Mirziyoyeva.