O‘zbekiston Respublikasi Prezidenti Shavkat Mirziyoyev, bugun, 22 dekabr kuni o‘tkazilgan yig‘ilishda eng katta armoni nima ekani haqida ham to‘xtalib o‘tdi.

— Joylarda ayrim mutasaddilar tadbirkorga kalamushday yopishib olgan. Tadbirkorlarni tekshiraverib, ishlashiga yo‘l qo‘ymaydi. Ularni amalda yetarlicha quvvatlay olmayotganimiz mening eng katta armonim. Endi ularni tekshirish bilan prokuraturaning maxsus bo‘limi shug‘ullanadi. Buni shaxsan Prezident nazorat qiladi, — dedi Shavkat Mirziyoyev o‘z murojaatnomasida.

Tadbirkorlar haqida gapirar ekan, Mirziyoyev britaniyalik taniqli siyosatchi Uinston Cherchillni yodga oldi.

— Cherchillni ko‘proq o‘qigan odam kam bo‘lmaydi, u hayotimizga mos gaplarni aytgan. Men sizlarga uning tadbirkorlar haqida jaydari tilda aytgan gapini misol keltirmoqchiman: «Ba’zilar tadbirkor deganda sog‘in sigirni, ba’zilar og‘ir aravani tortayotgan mehnatkash otni tushunadi». Cherchill bekorga aytmagan bu gaplarni. Yakka hokimlikka hech kimning haqqi yo‘q, — deya Prezident Cherchillni ko‘proq o‘qib turishga chaqirdi.