Farg‘ona viloyati, Marg‘ilon shahar «Qirguli» MFYning Matrudi ko‘chasida yashovchi fuqaro Tabiat resurslari vazirligi Farg‘ona viloyati boshqarmasining «Ishonch telefoni»ga murojaat qilib, xonadoniga tulki kirib qolganini ma’lum qildi. Ushbu holatni o‘rganish maqsadida Marg‘ilon shahar Tabiat resurslari inspeksiyasi davlat inspektorlari aytilgan manzilga borishdi.

«Fuqaro xonadoniga kelib qolgan hayvon haqiqatdan tulki bolasi ekanligi ma’lum bo‘ldi. Jonivorning ahvoli qoniqarliligi bois, Farg‘ona shahridagi hayvonot bog‘iga dalolatnoma asosida boshqarma xodimlari tomonidan topshirildi», – deydi Tabiat resurslari vazirligi Farg‘ona viloyat boshqarmasi matbuot xizmati xodimi G.To‘xtasinova. 

Ma’lumot o‘rnida: odatda tulkilar to‘da bo‘lib yashamaydilar, ular yolg‘iz yashashni ma’qul ko‘radilar. Tulkilar kunduziga nisbatan kechasi yaxshi ko‘rgani sababli faqat tunda ovga chiqadi, shuningdek, ular soatiga 50 km tezlik bilan yuguradi. Xuddi qushlar kabi tulkilar ham yerdagi magnit maydoni bo‘yicha manzilini qidirib topa oladi. Farg‘ona viloyatida ham – Quva tumani adirliklari, Markaziy Farg‘onaning cho‘l hududlari, viloyatdagi qirg‘oq bo‘yi to‘qaylarida ham ko‘proq uchrashi aniqlangan.

Tabiat resurslari vazirligi Farg‘ona viloyat  boshqarmasi o‘z vaqtiga xabar bergan xonadon sohiblariga minnatdorchiligini bildiradi.

Aytish kerakki, viloyat ekoinspektorlari OAV bilan hamkorlikni yaxshi yo‘lga qo‘ygan, hamda aholi bilan hayvonot va o‘simlik dunyosini asrash bo‘yicha doimiy targ‘ibot - tashviqot ishlari olib boriladi. Natijada  aholi va jamoatchilikning tabiatni asrash borasida roli ancha faollashgan.