«Mikrokreditbank» ATB tomonidan dehqon xo‘jaliklariga ijaraga berilgan 81 ta konturdagi 887 gektar yer maydonlarida «Bir kontur — bir mahsulot» tamoyili asosida namunali loyihalarni amalga oshirish uchun 81 ta agregatorlar tanlab olindi.

Bank axborot xizmatining xabar berishicha, ushbu agregatorlar tomonidan joriy yilda birinchi ekinda poliz va meva-sabzovot ekinlari ekiladi. Buning uchun agregatorlarga tijorat banklari tomonidan 2,7 mlrd so‘m imtiyozli kreditlar ajratiladi. Ushbu agregatorlarga 2 621 nafar kishi kooperatsiya a’zosi sifatida biriktirilishi belgilangan.

Kooperativ a’zolari tomonidan yuqori daromadli va eksportbop (qishki qovun-tarvuz, gulkaram, qizil lavlagi, loviya va sabzi-sholg‘im) mahsulotlari ekiladi.  

Xususan, Samarqand viloyati Narpay tumani Nuxay mahalladagi 24-konturda 35 nafar yoshlarga 40 sotixdan ajratilgan 14 gektar yer maydonada Agregator «Diyorjon Davronjon servis» oilaviy korxonasi boshchiligida birinchi ekinga bahorgi sabzi yetishtiriladi. Dastlabki hisob-kitoblarga ko‘ra, bir kooperativ a’zosi o‘rtacha 55 mln so‘mdan daromad olishi reja qilinmoqda.

Prezident rahbarligida 2024 yil 16 dekabrda o‘tkazilgan videoselektor yig‘ilishida «Super loyiha» doirasida «yetishtirish - qayta ishlash - sotish» zanjirini yaratish va respublika hududida qo‘shimcha 7 ta shunga o‘xshagan namunaviy loyihalarni amalga oshirish vazifasi yuklatilgandi.

Buning ijrosi sifatida, Qoraqalpog‘iston Respublikasi Chimboy tumani «Tazg‘ara» mahallasida yoshlarga ijaraga berilgan 20 gektar yer maydonida birinchi ekinga pomidor, keyin ko‘kat yetishtirish taklifi berilgan bo‘lib, ayni paytda ushbu loyihani dastlabki xarajatlar uchun bank tomonidan moliyalashtirish ishlari boshlab yuborilgan.