Britaniyaning «Autonaut» startapi okeanni monitoring qilish maqsadida dengizchilarsiz boshqariladigan qayiq yaratdi. «Dengiz sanitari» nomini olgan loyiha to‘lqinlar energiyasi hisobiga ishlaydi, datchiklari esa quyoshdan quvvat oladi, deb xabar berdi «Hi-tech.mail.ru».

Dengiz va okeanlarning monitoringi insoniyat uchun juda muhim hisoblanadi. Biroq yoqilg‘i sarfi insonlar uchun ushbu masalani mushkullashtirib kelardi. «Autonaut» loyihasi sabab olimlar ekologik toza mahsulotni yaratdi. U minimal sarf-xarajatlar evaziga okeanning eng chekka nuqtalariga qadar yetib borishga qodir.

Dron qayiqlar dengiz to‘lqinlari hisobiga hosil bo‘ladigan energiya natijasida harakatlanadi. Qayiq o‘z tezligini soatiga 5,5 kilometrga qadar chiqara oladi, shuningdek, u to‘fonli sharoitlarda ham suzishga qodirligi aytilmoqda.

Mazkur loyiha to‘lqinli dvigatellarning tijorat maqsadida ilk bor qo‘llanilishi. U shu qadar shovqinsizki, hatto delfinlarning «suhbati»ni aniqlashga ham to‘sqinlik qilmaydi. «Autonaut» eng zamonaviy datchiklar yordamida ma’lumotlarni sun’iy yo‘ldosh orqali real vaqt rejimida uzatishga qodir.