Ijtimoiy tarmoqlarda Toshkent tumanida joylashgan maktablardan birining sportzalida o‘quvchilar o‘rtasida ommaviy janjal sodir bo‘lgani tasvirlangan video tarqaldi.

Toshkent viloyati IIBB matbuot xizmatining ma’lum qilishicha, videoda tasvirlangan holat 30 noyabr kuni basketbol musobaqasi vaqtida kelib chiqqan.

Qayd etilishicha, 2021 yil 30 noyabr kuni soat taxminan 10:00 larda Toshkent tumanida joylashgan 9-maktab sportzalida tuman XTBga qarashli 18 va 31-sonli umumta’lim maktablarining o‘quvchilari o‘rtasida basketbol musobaqasi bo‘lib o‘tgan.

Musobaqada kuzatuvchi bo‘lgan S.A. (2001 yil tug‘ilgan) sport zalda o‘zaro janjallashayotgan maktab o‘quvchilarining bezorilik harakatlarining oldini olish chorasini ko‘rayotgan X.V.ning (voyaga yetmagan 2004 yil tug‘ilgan) hech bir sababsiz yuz sohasiga urib tan jarohati yetkazgan.

Sudga oid tibbiy ekspertizaga ko‘ra, jabrlanuvchi X.V. sog‘lig‘ining qisqa muddatga buzilishiga olib kelgan yengil tan jarohati olgan.

Mazkur holat yuzasidan 17 dekabr kuni Toshkent tumani IIB Tergov bo‘limi tomonidan fuqaro S.A. ga nisbatan Jinoyat kodeksining 277-moddasi (bezorilik) 3-qismi «g» bandi bilan jinoyat ishi qo‘zg‘atilgan. Tergov harakatlari olib borilmoqda.

Shuningdek, IIB mas’ullari tomonidan keyinchalik maktablarda shu kabi holatlarning oldini olish yuzasidan maktab rahbariyati va o‘quvchilari ishtirokida profilaktik suhbat o‘tkazilib, ushbu holat muhokamaga qo‘yilgan. Jarayonda kuzatuvchi bo‘lgan ayrim o‘quvchi va maktab xodimlari ogohlantirilgan.