Joriy yilning so‘nggiga qadar homilador ayollar va bolalarga hududidan qat’i nazar, kafolatlangan bepul tibbiy xizmatdan foydalanish imkoni yaratiladi.

Bu haqda 2023-yil 20-iyundagi «Ma’muriy islohotlar doirasida sog‘liqni saqlash sohasida davlat boshqaruvini samarali tashkil qilish chora-tadbirlari to‘g‘risida»gi PQ-197-son  qarorda gap boradi.

Mazkur hujjatning 5-ilovasida sog‘liqni saqlash sohasida islohotlarni chuqurlashtirish va tizim faoliyatini takomillashtirish bo‘yicha «yo‘l xaritasi» tasdiqlangan. Unga ko‘ra, onalik va bolalikni muhofaza qilishni kuchaytirish maqsadida joriy yil 1-avgustga qadar ularning salomatligini muhofaza qilish bo‘yicha uch yillik dastur ishlab chiqiladi.

Shuningdek, 2023-yil yakuniga qadar:

• Bolalar, o‘smirlar va homilador ayollarni 7 turdagi vitamin va minerallar bilan bepul ta’minlash.
• Homilador ayollar va bolalarga hududidan qat’i nazar, kafolatlangan bepul tibbiy xizmatdan foydalanish imkonini yaratish.
• Onalik va bolalikni muhofaza qilish yo‘nalishida takrorlanuvchi xizmat turlarini optimallashtirish ishlari olib boriladi.

Ma’lumot uchun, ushbu tadbirlar davlat budjetidan ajratilgan mablag‘lar hisobiga amalga oshiriladi.