Muzxona — ko‘pchilikning xaloskori. Undan mahsulotlarni aynitib qo‘ymaslik uchun foydalanamiz. Biroq, «Stern»ning yozishicha, ayrim yeguliklarni muzlatish mumkin emas ekan. Xo‘sh, ular qaysilar?

Go‘sht

Go‘shtni qaytadan muzlatish man etiladi. Birinchi marta muzlatilganda unda bakteriya va mikroblar paydo bo‘lishi mumkin. Yeb tugatish va qayta muzlatmaslikka amin bo‘lsangizgina, go‘shtni eriting.

Pasta

Tayyor pastani zinhor qayla bilan birga muzlata ko‘rmang. Aks holda erigach yumshab, bir xil massaga aylanadi. Yaxshisi, qaylani alohida muzlating.

Kartoshka

Kartoshka fri va boshqa qovurilgan taomlarni muzlatib bo‘lmaydi. Chunki keyin yumshoq va shaklsiz bo‘lib qoladi.

Gazlangan ichimlik

Gazlangan ichimliklarni muzlatish ham man etiladi. Chunki ular tarkibidagi karbonat angidrid gazi muzlaganda kengayadi. Natijada idish yorilib ketishi hech gap emas.

Sut va pishloq

Muzlatilganda sut konsistensiyasi o‘zgaradi va yormalar paydo bo‘ladi. Shunga ko‘ra pishloqni ham muzlatish taqiqlanadi – u ham konsistensiyasini o‘zgartiradi.

Tuxum

Chaqilgan tuxumni muzlatsa bo‘ladi. Faqat qaynatilgan yoki xomini tuxum po‘chog‘ida muzlatish mumkin emas. Oqsilli qaylalarni ham muzlatmagan ma’qul – ularning konsistensiyasi o‘zgaradi.

Tarvuz, bodring, olma

Tarkibida ko‘p miqdorda suvi bor mahsulotlarni muzlatish yaramaydi. Kartoshka, tarvuz, bodring, olma shular jumlasidan. Erigach, bemaza bo‘lib qoladi.

Ko‘kat

Ko‘katni muzlatsa bo‘ladi, faqat buni to‘g‘ri amalga oshirish kerak. Yaxshisi, uni muz qoliplariga soling. Agar bog‘langan ko‘rinishdagi ko‘katni muzlatsangiz, keyin uni ishlatishga qiynalasiz. Ustiga-ustak, erigach konsistensiyasi o‘zgaradi, bo‘tqaga aylanadi.