Navoiy viloyati bo‘yicha «Yashil makon» umummilliy loyihasi doirasida ekilgan daraxt va buta ko‘chatlarning holati yuzasidan o‘rganish ishlari o‘tkazildi.

Xususan, 23-yanvardan 22-iyulga qadar o‘tkazilgan o‘rganish davomida Uchquduq tumanida 10 nafar, Konimex tumanida 7 nafar, Navbahor tumanida 6 nafar, Karmana tumanida 5 nafar, Qiziltepa tumanida 5 nafar, Tomdi tumanida 5 nafar, Xatirchi tumanida 5 nafar, Zarafshon shahrida 4 nafar, Nurota tumanida 3 nafar, Navoiy shahrida 2 nafar, G‘ozg‘on shahrida 1 nafar mas’ul shaxslar tomonidan hududlarda 2023-yil kuzi va 2024-yil bahor mavsumi davomida ekilgan daraxt ko‘chatlari parvarishiga e’tibor qilmaganligi, sug‘orilmaganligi, agrotexnik tadbirlar amalga oshirilmaganligi aniqlandi.

Holat yuzasidan 53 nafar mas’ul shaxsga nisbatan O‘zbekiston Respublikasi MJtKning 79-moddasi 3-qismi bilan ma’muriy bayonnoma rasmiylashtirilib, jami 180 mln 200 ming so‘m miqdorida jarima belgilandi.

Ekologiya vazirligi bergan ma’lumotga ko‘ra, ayni damda  nafaqat Navoiy viloyati, balki butun respublika miqyosida «Yashil makon» umummilliy loyihasi doirasida ekilgan ko‘chatlar parvarishi yuzasidan o‘rganish ishlari davom ettirilmoqda.