Joriy yil 22-sentyabr kuni Namangan viloyatining Chust tumanida o‘nlab bolalarning bepul tarqatilgan yod preparati iste’moli sabab zaharlangani haqida xabarlar tarqalgan edi.

Mazkur holat bo‘yicha 3 nafar mas’ul qamoqqa olindi.

Oliy sud matbuot xizmati xabariga ko‘ra, Jinoyat ishlari bo‘yicha Yashnobod tuman sudining 2023 yil 7 va 16 noyabr kunlaridagi ajrimlari bilan Bosh prokuror o‘rinbosarining iltimosnomalariga ko‘ra, 3 nafar gumon qilinuvchiga nisbatan qamoqqa olish tarzidagi ehtiyot chorasi qo‘llanilib, tergov hibsxonasiga joylashtirilgan.

Ular Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi «a» bandi, 205-moddasi (hokimiyat yoki mansab vakolatini suiiste’mol qilish) 2-qismi “a” bandi va 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) 1-qismlarida nazarda tutilgan jinoyatlarni sodir etganlikda gumon qilinyapti.

Jinoyat-protsessual kodeksining tegishli moddalari tartibida ushlanganlar:

• N. A. (ayol, Respublika ixtisoslashtirilgan endokrinologiya ilmiy-amaliy markazi laboratoriya mudiri, katta ilmiy xodim xodim, Sog‘liqni saqlash vazirligi Bolalar bosh endokrinologi, bosh mutaxassisi);
• F. X. (ayol, Respublika ixtisoslashtirilgan endokrinologiya ilmiy-amaliy markazi direktorining davolash ishlari bo‘yicha o‘rinbosari – bosh shifokori, Sog‘liqni saqlash vazirligi Bosh endokrinologi, bosh mutaxassisi);
• X. G. (ayol, Sog‘liqni saqlash vazirligi Dori vositalari, tibbiy buyumlar va jihozlar muomalasini tartibga solish va muruvvat yordamini muvofiqlashtirish boshqarmasi boshlig‘i lavozimida ishlagan).