Xalq deputatlari Namangan shahar kengashining navbatdan tashqari sessiyasi bo‘lib o‘tdi. Unda tashkiliy masala ko‘rildi, deb xabar bermoqda viloyat hokimligi axborot xizmati. 

Sessiyada deputatlar Namangan viloyati hokimining G‘ofur Jamolovni boshqa ishga o‘tishi munosabati bilan Namangan shahar hokimi vazifasidan ozod qilish, Anvar Otaxo‘jayevni esa Namangan shahar hokimi etib tayinlash to‘g‘risidagi qarorlarini bir ovozdan tasdiqlashgan.

Ma’lumot uchun, Anvar Otaxo‘jayev tayinlovga qadar Chortoq tumani hokimi lavozimida ishlagan.

G‘ofur Jamolovning yangi ish joyi ham ma’lum. U viloyat hokimining qurilish, kommunikatsiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimiga tayinlangan.

Shuningdek, Shavkat Abdurazzoqov o‘ziga yana bir o‘rinbosar tayinlagan. J.Hotamov Namangan viloyati hokimining jamoat va diniy tashkilotlar bilan aloqalar masalalari bo‘yicha o‘rinbosari lavozimiga tayinlangan. Hotamov bungacha qayerda va qaysi lavozimda ishlagani ochiqlanmagan.