AQSh davlat kotibi Entoni Blinken rasmiy Vashington nomidan O‘zbekiston xalqini Mustaqillik kuni bilan tabrikladi. Tabrik matni 31 avgust kuni Davlat departamenti rasmiy saytida e’lon qilingan.

Entoni Blinkenning qayd etishicha, 32 yil davomida AQSh va O‘zbekiston hamkorligi O‘zbekiston mustaqilligi, suvereniteti va hududiy yaxlitligiga umumiy sadoqat asosida qurilgan.

«32 yil davomida Amerika Qo‘shma Shtatlari va O‘zbekiston o‘rtasidagi hamkorlik O‘zbekiston mustaqilligi, suvereniteti va hududiy yaxlitligiga umumiy sadoqat asosida qurilgan. Shu kuni biz ushbu strategik sheriklikni mustahkamlash, jumladan, mintaqaviy xavfsizlikni ta’minlash, iqtisodiy aloqalarni kengaytirish, xalqlar o‘rtasidagi aloqalarni kengaytirish va inson huquqlarini himoya qilishga intilish kabi muhim sohalarda amalga oshirilayotgan ishlarni nishonlaymiz», – deyiladi tabrikda.

Shuningdek, davlat kotibi AQSh va O‘zbekiston o‘rtasidagi strategik sheriklikni yanada rivojlantirish, tomonlarni qiziqtirgan masalalarga yechim topish, mamlakatlar o‘rtasida mustahkam do‘stlik va ishonchni mustahkamlashga intilishini bildirgan.

«O‘zbekiston Markaziy Osiyo taraqqiyotining markazida bo‘ldi va biz uning mintaqaviy tinchlik, farovonlik va xavfsizlikka sodiqligini yuqori baholaymiz. Biz Amerika Qo‘shma Shtatlari va O‘zbekiston o‘rtasidagi strategik sheriklikni yanada rivojlantirish, tomonlarni qiziqtirgan masalalarga yechim topish, mamlakatlarimiz o‘rtasidagi mustahkam do‘stlik va ishonchni mustahkamlashga intilamiz», – deyilgan xabarda.