Kecha, 29 avgust kuni «O‘zbekkino» Milliy agentligi binosida Agentlik, O‘zbekiston Respublikasi Yoshlar ishlari agentligi hamda «Mening yurtim» telekanali bilan hamkorlikda «CinemaDays-2020» kino kunlari doirasida «Yosh kinematograflar festivali» bo‘lib o‘tdi.

Festivalda O‘zbekiston Respublikasi Bosh vaziri o‘rinbosari Behzod Musayev, O‘zbekiston Respublikasi Yoshlar ishlari agentligi direktori Alisher Sa’dullayev, «O‘zbekkino» Milliy agentligi direktori Firdavs Abduxoliqovlar so‘zga chiqib, barcha yosh kinoijodkorlarni tabriklashdi. Tadbirda jurnalistlar hamda jamoatchilik faollari ham ishtirok etdi.

Tadbir doirasida «O‘zbekkino» Milliy agentligi bu yil birinchi bora tashkil etilayotgan «Debyut» yosh kinoijodkorlarning ssenariylar tanlovi g‘oliblarini taqdirladi hamda bu tanlov muntazam ravishda har yili o‘tkazilishini ma’lum qilindi.

Shuningdek, «O‘zbekkino» Milliy agentligi tomonidan Yaponiyaning «DigiCon6 ASIA» kinofestivalida ishtirok etishga muvaffaq bo‘lgan yoshlarni taqdirlash marosimi ham o‘tkazildi. Shuni aytib o‘tish lozimki, Yaponiyaning «DigiCon6 ASIA» kinotadbiriga filmlarni yuborish va boshqa xarajatlar «O‘zbekkino» Milliy agentligi budjet mablag‘lari hisobidan qoplanadi.

Yana ushbu kun «O‘zbekkino» Milliy agentligida Butunrossiya davlat kinematografiya instituti (VGIK)ga qabul qilingan 7 nafar o‘zbekistonlik talabalarga diplom va esdalik sovg‘alari topshirildi. E’tiborli jihati, bunday tadbir mustaqil O‘zbekiston kinematografiyasi tarixida ilk bora amalga oshirilmoqda.

Yoshlar festivali davomida yosh kinoijodkorlar bilan seminar-treninglar o‘tkazildi. Estrada yulduzlarining chiqishlari, shoular va qisqa metrajli filmlar namoyishlari tashkil etildi.

«O‘zbekkino» Milliy agentligi Axborot xizmati