Hollivuddagi Dolby Theatre saroyida kino olamining eng nufuzli — «Oskar» mukofotini topshirish marosimi bo‘lib o‘tdi.

Tashkilotchilar bu yil ilk bor sakkiz nominatsiya (pardoz, original musiqa, sahnalashtirish, ovoz, montaj, qisqa metrajli animatsion film, qisqa metrajli hujjatli va badiiy film) g‘oliblarini tantanali marosim oldidan e’lon qilishga qaror qildi.

Bu yil «Oskar» mukofotiga jami 38 ta asar da’vogarlik qildi. Quyida asosiy nominatsiyalar bo‘yicha g‘oliblarni tanishtiramiz.

Operatorlik ishi va maxsus effektlar

«Dyuna» filmi ushbu nominatsiyada mukofotni qo‘lga kiritdi.

Deni Vilnyovning ushbu filmi «Oskar» mukofotiga o‘nta nominatsiya bo‘yicha nomzod bo‘ldi, jumladan, yilning eng yaxshi filmi nomiga ham da’vogarlik qildi. Operatorlik ishi bo‘yicha «Oskar» mukofoti Greyg Freyzerga, vizual effektlar mukofot esa to‘rt kishilik jamoaga nasib etdi.

Multfilm

Disneyning «Enkanto» filmi to‘liq metrajli animatsion film nominatsiyasida «Oskar»ni qo‘lga kiritdi.

Ikkinchi plandagi rol

Troy Kotsur «CODA: kar ota-onaning farzandi» filmida «Ikkinchi plandagi eng yaxshi aktyor» nominatsiyasida Akademiya mukofotiga loyiq topilgan bo‘lsa, «Vestsayd tarixi» musiqiy filmi aktrisasi Ariana DeBos «Ikkinchi plandagi eng yaxshi aktrisa» mukofotiga sazovor bo‘ldi.

Eng yaxshi ssenariy

Kennet Brana «Belfast» filmi uchun original ssenariy uchun Akademiya mukofotini qo‘lga kiritgan bo‘lsa, «CODA» filmi ssenariysi muallifi va rejissyori Shan Xeyder «Eng yaxshi moslashtirilgan ssenariy» uchun taqdirlandi.

Rejissyorlik ishi

Jeyn Kempion «The Power of the Dog» filmi uchun «Eng yaxshi rejissyor» nominatsiyasida g‘olib bo‘ldi.

Qo‘shiq

Xonanda Billi Aylish Jeyms Bond haqidagi so‘nggi — «O‘lishning vaqti emas» filmi uchun yozilgan qo‘shig‘iga «Oskar» mukofotini qo‘lga kiritdi.

Eng yaxshi aktyor

Uill Smit «Qirol Richard» kartinasidagi roli uchun «Eng yaxshi aktyor» nominatsiyasida Akademiya mukofoti bilan taqdirlandi.

Eng yaxshi aktrisa

Jessika Chesteyn «Temmi Feyning ko‘zlari» filmidagi ijrosi uchun «Eng yaxshi aktrisa» nominatsiyasida «Oskar» mukofotini qo‘lga kiritdi.

Eng yaxshi film

Shan Xeyderning «CODA» filmi yilning eng yaxshi filmi nominatsiyasida «Oskar» mukofotiga loyiq topildi.