Afrikada koronavirus tarqalishi tezlashib ketdi, deya ma’lum qildi Jahon sog‘liqni saqlash tashkilotining Afrika mintaqaviy byurosi direktori Matshidiso Moeti. Bu haqda «BBC News» xabar berdi.

Tashkilot vakilining so‘zlariga ko‘ra, epidemiya qit’adagi mamlakatlar poytaxtidan tashqarida ham keng tarqalmoqda. Test va boshqa tibbiy asbob-uskunalarning yetishmasligi jiddiy muammoga aylanishi turgan gap. Ta’kidlanishicha, mahalliy hokimiyatlar virus tarqalishining oldini olishga imkoni boricha harakat qilmoqda.

«Reuters»ning xabariga ko‘ra, Afrikada koronavirusni yuqtirganlar soni 200 mingdan oshib ketgan, vafot etganlar soni esa 5 ming atrofida. Shu bilan birga, epidemiya dvigatellari hisoblanmish 10 ta mamlakat hissasiga jami kasallanganlarning 75 foizi to‘g‘ri keladi.

Aprel oyida JSST mutaxassislari Afrikada koronavirusga chalinishlar soni birdaniga 10 milliongacha yetishi mumkinligidan ogohlantirishgandi. JSST koronavirusni davolashni yaxshilash hamda o‘lim darajasini kamaytirish maqsadida mahalliy hokimiyatlar bilan hamkorlik qilyapti.