Android qurilmalar uchun Xabar.uz mobil ilovasi. Yuklab olish ×

O‘n besh yil avval to‘xtab qolgan yirik avtomagistral qurib tugatilmoqda

O‘n besh yil avval to‘xtab qolgan yirik avtomagistral qurib tugatilmoqda

Foto: Xabar.uz

Bundan bir necha yil ilgari Xalqaro ahamiyatdagi A-380-«G‘uzor-Buxoro-Nukus-Beynou» avtomobil yo‘lining bir qismi sementobeton qoplamali qilib qurilgan bo‘lib, ikkinchi qatnov tomoni ta’mirtalab ahvolda edi

Mazkur yo‘lda 2008-yildan yo‘lsozlash ishlari boshlangan bo‘lib, 2008-2009-yillarda esa tender masalasining ortga surilgani ishning oqsoqlanib kolishiga sabab bo‘lgan. Oradan o‘n yilcha vaqt o‘tib, ya’ni 2019-yilda ushbu yo‘nalishning 87 kilometr masofasi tender orqali Xitoy yo‘lqurilish kompaniyasi tomonidan yutib olingan.

«Bugungi kunda xalqaro ahamiyatdagi ushbu A-380-«G‘uzor-Buxoro-Nukus-Beynou» avtomobil yo‘li jahon standartlariga mos sifatda xorij kompaniyasi tomonidan qurilgan. Ushbu yo‘l O‘zbek milliy avtomagistralining tarkibiy qismi sanalib, u orqali Markaziy va Sharqiy Yevropa, Rossiya, Ukraina va Qozog‘istonga chiqish ta’minlanadi. O‘zbekiston orqali trans-afg‘on transport yo‘nalishiga bog‘lanadi. Ushbu avtomagistral Qoraqalpog‘iston Respublikasi, Xorazm, Buxoro va Qashqadaryo viloyatlari hududidan o‘tib, davlatlararo, viloyatlararo aloqalarni ta’minlashda ham muhim bo‘g‘in hisoblanadi»,-dedi viloyat rahbari Botir Zaripov mazkur avtomagistralda olib borilayotgan rekonstruksiya ishlari bilan tanishib, ishlarni yanada jadallashtirish yuzasidan mas’ullarga topshiriq va ko‘rsatmalar berar ekan.

Ushbu avtomagistral o‘z navbatida xalqaro ahamiyatdagi M37 «Samarqand—Buxoro—Turkmanboshi» va M39 «Almata—Beshkek—Toshkent—Termiz» avtomobil yo‘llarini bog‘laydigan muhim xalqaro yo‘nalishlarni ham bog‘lab turadi.

Yaqinda mazkur avtomobil yo‘lining Kogon shahri, Kogon, Buxoro va Qorovulbozor tumanlari hududidan o‘tgan qismida «Yashil makon» umummilliy loyihasi o‘tkazilgan. Xalqaro ahamiyatga ega yo‘lning ikki tomonida qariyb, 7 kilometrlik masofadagi yerlar maxsus texnikalar yordamida tekislanib, qazish ishlari sifatli amalga oshirilgan. Buxoro iqlimiga mos, issiq va sovuq ob-havo sharoitiga chidamli manzarali daraxt ko‘chatlari o‘tqazilgan.

«Avvalgi o‘nqir-cho‘nqir, qishda loy, yozda changi osmonga ko‘tarilib, yaroqsiz holdagi ushbu magistral yo‘l endilikda tekis va ravon ko‘rinishga kelib, ham mahalliy, ham xorijdan qatnayotgan qo‘shni davlatlar vakillarining kayfiyatini ko‘taradi»,-dedi Botir Zaripov.

 

Izohlar

Izoh qoldirish uchun saytda ro'yxatdan o'ting

Kirish

Ijtimoiy tarmoqlar orqali kiring