Prokuratura organlari tomonidan joriy yilning o‘tgan davrida qo‘pol qonun buzilishi holatlari bo‘yicha 39 ta jinoyat ishi qo‘zg‘atilib, davlatga yetkazilgan 20 mlrd. so‘m zarar undirildi. Bu haqda AOKAda o‘tkazilgan brifingda Bosh prokuratura axborot xizmati rahbari Hayot Shamsutdinov ma’lum qildi.

Aholi bandligini ta’minlash sohasida aniqlangan qonun buzilishi holatlari bo‘yicha 337 nafar shaxs intizomiy, ma’muriy va moddiy javobgarlikka tortildi, 34 ta jinoyat ishi qo‘zg‘atildi hamda  1 ming 283   nafar   shaxsning   buzilgan  huquqlari  tiklandi.

Ushbu sohada o‘tkazilgan o‘rganishlarda 31 ming 087 ta yangi ish o‘rinlari hisobotlarga qo‘shib yozilganligi aniqlanib, aybdor shaxslar   tegishli   javobgarlikka   tortildi. Bundan tashqari, 174 nafar ishchi - xizmatchilarning kechiktirilgan 510  mln.  so‘m  ish  haqlari  undirib  berilishi  ta’minlandi.

Prokurorlar tashabbusi bilan 276 marotaba mehnat yarmarkalari o‘tkazilib, ularda 3 ming 623 nafar ishsiz fuqarolar ishga  joylashtirildi. Aholining kommunal xizmat ko‘rsatuvchi boshqaruv servis tashkilotlaridan bo‘lgan qarzdorligini undirish bo‘yicha zarur  choralar   ko‘rilmoqda. Jumladan, boshqaruv servis tashkilotlarining debitor qarzdorligi joriy yilning 1 yanvar holatiga 561,8 mlrd. so‘mni tashkil  etgan.

O‘tkazilgan xatlov jarayonida 550 mingga yakin mulkdorlarga majburiy to‘lovni to‘lab berish yuzasidan talabnomalar yuborildi, 270 mlrd. so‘m qarzdorliklarni undirish bo‘yicha sudlarga arizalar kiritildi, 268,5 mlrd. so‘m qarzdorlik  undirildi.

Xuddi shu kabi, issiqlik ta’minoti korxonalarining xatlovda aniqlangan 271,8 mlrd. so‘m debitor karzdorliklarining 168,9 mlrd. so‘mi undirilib, sudlarga 85,4 mlrd. so‘mlik  arizalar  kiritildi.