O‘zbekiston Respublikasi Prezidenti Shavkat Mirziyoyev kecha, 29-may kuni «Qishloq xo‘jaligi mahsulotlari ishlab chiqaruvchilarga mexanizatsiya va servis xizmatlarini ko‘rsatish samaradorligini oshirish bo‘yicha qo‘shimcha chora-tadbirlar to‘g‘risida»gi qarorni imzolagani haqida xabar bergan edik.

Unga ko‘ra, 2020-yil 1-yanvarga qadar o‘tkazilgan eksperiment natijalari bo‘yicha mashina-traktor parklarini boshqarishni tashkil etishning eng samarali shaklini qo‘llash bo‘yicha asoslangan taklif kiritiladi.

2020-yilga O‘zbekiston Respublikasining Davlat budjetini shakllantirishda hosildorligi past yerlarga xizmat ko‘rsatuvchi «O‘zagroservis» AJ mashina-traktor parklari uchun qishloq xo‘jaligi texnikasini sotib olishga subsidiyalar ajratadi.

2018-yil 1-iyuldan yakka tartibdagi tadbirkorlarga qishloq xo‘jaligi mahsulotlarini ishlab chiqaruvchilarga mexanizatsiya va servis xizmatlari ko‘rsatish faoliyatini amalga oshirishga ruxsat beriladi.

O‘zbekiston Respublikasi Bosh prokuraturasi eksperiment o‘tkazishda qonunchilikka rioya etilishi hamda davlat organlari mansabdor shaxslarining mashina-traktor parklari, fermer xo‘jaliklari va tadbirkorlik sub’yektlarining qonuniy faoliyatiga aralashishlariga yo‘l qo‘yilmasligi ustidan qat’iy nazorat o‘rnatadi.