Prezident Shavkat Mirziyoyev bugun yoshlar masalasi bo‘yicha videoselektor o‘tkazmoqda.

«Xabar.uz» muxbirining ma’lum qilishicha, davlat rahbari yig‘ilish avvalida yoshlar bo‘yicha tashabbuslarni amalga oshirishda sustkashlikka yo‘l qo‘yilayotganini ta’kidlab o‘tdi.

— Yil boshidan buyon yoshlar masalasida ikkinchi marotaba videoselektor yig‘ilishi o‘tkazayotganimiz bejiz emas. Chunki bu masalada olib borilayotgan ishlardan noroziman. Ba’zi tuman hokimlari mas’uliyatni his eta olmayapti.

Joriy yilda yoshlarni qo‘llab-quvvatlash bo‘yicha, oldimizga katta marra va muhim vazifalarni belgilab olganmiz.

Yanvar oyida o‘tkazilgan yig‘ilishda 2 ta ustuvor yo‘nalish – yoshlarning bandligi va ularning bo‘sh vaqtini mazmunli tashkil etish bo‘yicha topshiriqlar berilgan edi. Ammo bu topshiriqlar ijrosi bo‘yicha qilinayotgan ishlar talabga javob bera olmaydi, — dedi Shavkat Mirziyoyev.

Yig‘ilish davomida misol tariqasida ta’kidlanishicha, Andijon viloyatida 80 ming nafar ishsiz yoshlardan, birinchi chorakda 35 ming 600 nafarining bandligi ta’minlangan bo‘lsa, shundan bor-yo‘g‘i 5 mingga yaqini doimiy ishlarga joylashtirilgan, xolos.