O‘zbekiston Prezidenti Shavkat Mirziyoyevning 2017 yil 25 yanvardagi «O‘zbekiston Respublikasining Birinchi Prezidenti Islom Abdug‘aniyevich Karimovning xotirasini abadiylashtirish to‘g‘risida»gi qarorida Islom Karimov hayoti va serqirra faoliyatiga bag‘ishlangan maxsus pochta markalari klyasserini chop etish kiritilgan edi.

Ushbu o‘ziga xos loyihani amalga oshirish uchun «O‘zbekiston pochtasi» AJ qoshidagi «O‘zbekiston markasi» filiali xodimlari va 30 dan ortiq vazirlik va idoralar vakillaridan iborat ijodiy guruh tomonidan qo‘shma reja – «yo‘l xaritasi» ishlab chiqarildi.

Ijodiy guruh diqqat e’tibori I.Karimovning tarixiy ahamiyatga molik faoliyatini pochta markalarida aks ettishga qaratildi.

Pochta markasi eskizi uchun olingan fotosuratlar sinchiklab saralandi. Ushbu jarayonda arxiv fotohujjatlarini saralash va klyasserni badiiy bezatishda Birinchi Prezidentning rafiqasi Tatyana Karimovaning yordami va g‘oyalari katta bo‘ldi.

2018 yil 30 yanvar kuni «O‘zbekiston pochtasi» AJ tomonidan tayyorlangan pochta markalari klyasseri O‘zbekiston Respublikasi axborot texnologiyalari va kommunikatsiyalarini rivojlantirish vazirligi tomonidan muomalaga kiritildi.

Ushbu klyasser nafaqat filatelistlar diqqatini o‘ziga tortadi, balki yosh avlodimizni ma’naviy-ma’rifiy jihatdan yetuk inson bo‘lib yetishlariga, Vatanga sadoqat tuyg‘ularini mustahkamlanishiga asos yaratadi.