O‘zbekiston Respublikasi Axborot texnologiyalari va kommunikatsiyalarini rivojlantirish vaziri Sherzod Shermatov boshchiligidagi delegatsiya Barselona shahrida joriy yilning 28-fevralidan 3 martigacha bo‘lib o‘tadigan «MWC Barcelona-2022» Jahon mobil kongressida ishtirok etmoqda.

«MWC Barcelona-2022» Xalqaro mobil kongressi 155 mamlakatdan 2000 dan ortiq turli kompaniya va tashkilotlarni birlashtirgan IT-sanoatidagi eng yirik xalqaro tadbirlardan biri hisoblanadi. Kongress doirasida yetakchi mutaxassislar va bozor ekspertlari AKT sohasidagi so‘nggi tendensiyalarni muhokama qiladilar hamda so‘nggi texnologik yutuqlar taqdimotlarini o‘tkazadilar.

Bu yilgi tadbir dasturi bulutli texnologiyalar, 5G texnologiyalarini rivojlantirish, sun’iy intellektlarni ilgari surish, internet texnologiyalarining kirib kelishi kabi dolzarb masalalarga bag‘ishlanadi.

Kongress ishtirokchilari orasida yetakchi xalqaro IT-kompaniyalar – texnologik asbob-uskunalar va dasturiy ta’minot ishlab chiqaruvchilari, telekommunikatsiya va mobil aloqa operatorlari, milliy IT-bozorlari vakillari bor. Ular orasida Amazon, AT&T, China Mobile, HTC, Huawei, ZTE, Amdocs, HP, Nokia, Qualcomm, Vodafone, Kaspersky, Accenture, Fujitsu va boshqalar bor. Tadbirni nufuzli ommaviy axborot vositalari, jumladan CNBC, Financial Times, The Wall Street Journal, Time, Euronews va boshqalar yoritib boradi.

Forum doirasida O‘zbekiston Respublikasi Axborot texnologiyalari va kommunikatsiyalarini rivojlantirish vazirligi rahbariyatining bir qator xorijiy IT-kompaniyalar bilan uchrashuvlar o‘tkazishi, «Huawei Industrial Digital Transformation Summit» sammitida hamda «Raqamli o‘zgarish» mavzusidagi konferensiyada ishtirok etishi rejalashtirilgan.