Rossiyadagi mehnat migrantlari bugundan patent rasmiylashtirishi zarur, deya xabar bermoqda Tashqi mehnat migratsiyasi agentligi.

Rossiya prezidentining joriy yil 18-apreldagi farmoniga muvofiq, mamlakat hududida chet el fuqarolarining qonuniy bo‘lishi huquqini beruvchi barcha hujjatlar, shu jumladan patentlarning amal qilish muddati 2020 yil 15 iyungacha uzaytirilgan edi.

2020-yil 15-iyundagi farmon bilan kiritilgan o‘zgartirishlarga ko‘ra, bugundan, ya’ni 16-iyundan boshlab Rossiya Federatsiyasi hududida chet el fuqarolarining ishlash huquqini beruvchi ruxsatnoma, shu jumladan patent rasmiylashtirish zarur bo‘ladi.

Shuningdek, farmon bilan: 

- chet el fuqarolari va fuqaroligi bo‘lmagan shaxslarning Rossiya Federatsiyasida vaqtincha bo‘lish, vaqtincha yoki doimiy yashash, yashash joyida ro‘yxatda turish muddatlari 2020-yilning 15-sentyarigacha tugashi ko‘zda tutilgan bo‘lsa, ushbu muddatlarni tugatmaslik;

- Rossiya Federatsiyasidan ma’muriy tartibda chiqarib yuborish to‘g‘risida qaror qabul qilingan chet el fuqarolari va fuqaroligi bo‘lmagan shaxslarning mamlakatdan ixtiyoriy chiqib ketish, deportatsiya qilish muddatlarini 2020- yilning 15-sentyabriga qadar uzaytirish belgilangan.

Eslatib o‘tamiz, Mehnat vaziri keltirgan statistikaga ko‘ra, pandemiya sabab 550 mingdan oshiq o‘zbekistonlik Rossiyaga keta olmagan.