O‘zbekistonda Ichki ishlar vazirligining bir qator vazifalarini Milliy gvardiyaga berish rejalashtirilmoqda. Jumladan, Ichki ishlar vazirligi huzuridagi «Qo‘riqlash» respublika birlashmasi — Milliy gvardiya qo‘riqlash bosh boshqarmasiga, ichki ishlar organlari huzuridagi texnik qo‘riqlash va harakat qilish punktlari (PTOR) — Milliy gvardiya qo‘riqlash bo‘limlarining texnik qo‘riqlash markaziga (punktiga) aylantiriladi. Bu haqda Vazirlar Mahkamasi tomonidan ishlab chiqilgan qaror loyihasida keltirilgan.

Qaror loyihasida Milliy gvardiyaga quyidagi vazifalarni topshirish rejalashtirilgan:

• surunkali alkogolizm yoki giyohvandlikka mubtalo bo‘lgan bemorlarni majburiy davolash —profilaktika muassasalarini qo‘riqlash;
• diplomatik vakolatxonalar va konsullik muassasalarini qo‘riqlash;
• teleko‘rsatuvlar va radioeshittirishlar ob’yektlarini qo‘riqlash, muhofaza qilish hamda ularning xavfsiz faoliyat ko‘rsatishini ta’minlash;
• «Do‘rmon» milliy bog‘ining xavfsizligini ta’minlash;
• Qimmatbaho metallar va qimmatbaho toshlardan zargarlik va boshqa buyumlar ishlab chiqarish sohasida ishlash guvohnomasini berish. 

Ma’lumot uchun, Milliy gvardiya 2017-yil avgustida Prezident farmoniga asosan tashkil etilgan edi. Joriy yil yanvarida Qo‘riqlash bosh boshqarmasi IIVdan Milliy gvardiya tarkibiga o‘tkazildi.