O‘zbekiston Xotin-qizlar qo‘mitasi, Qoraqalpog‘iston Respublikasi, viloyatlar va Toshkent shahar hokimligi hamkorligida «Bizning jamiyatda har bir ayol davlat himoyasidadir!» shiori ostida anjuman o‘tkazildi.

Xotin-qizlar qo‘mitasi tomonidan «Bizning jamiyatda har bir ayol davlat himoyasidadir!» shiori ostida viloyatlardan ish qidirib Toshkent shahriga kelgan xotin-qizlarni bandligini ta’minlash, ularning muammolarini hal etish maqsadida «Qo‘yliq» va «Chorsu» bozorlari atrofidagi norasmiy yollanma ishchilar to‘plangan joylarda bir martalik ish qidirib chiqqan xotin-qizlar o‘rtasida o‘rganishlar o‘tkazilmoqda.

Anjumanda ta’kidlanishicha, shu kungacha 150 nafar xotin-qizlar bilan muloqotlar uyushtirilgan, ularning yashash joylari bo‘lgan Andijon, Buxoro, Namangan, Samarqand, Surxondaryo va Farg‘ona viloyatlaridan Toshkent shahriga kelishlarining sabablari aniqlanib, Toshkent shahriga ish izlab kelgan xotin-qizlar davlatimiz tomonidan yaratilayotgan imkoniyatlardan, xususan tadbirkorlik bilan shug‘ullanish, imtiyozli kreditlar va tomorqa xo‘jaliklaridan maqsadli foydalanish, bandlikni ta’minlash kabi sohalarda belgilangan imtiyozlardan xabardor emasligi ma’lum bo‘lgan.

Xotin-qizlar qo‘mitasi tomonidan mutasaddi tashkilotlar bilan birgalikda mazkur sohadagi chora-tadbirlarni izchil amalga oshirish maqsadida, barcha viloyatlardagi norasmiy yollanma ishchilar to‘plangan joylarda ish izlab kelayotgan xotin-qizlar bilan muloqotlar o‘tkazish, ularning muammolarini aniqlash va bartaraf etish bo‘yicha chora-tadbirlarni tizimli davom ettirish, joylarda xotin-qizlar o‘rtasida tadbirkorlik bilan shug‘ullanish, imtiyozli kreditlar va tomorqa xo‘jaliklaridan maqsadli foydalanish kabi sohalarda belgilangan imtiyozlar haqida targ‘ibot ishlarini kuchaytirish rejalashtirilgan.