Navoiy — Buxoro yo‘nalishidagi temiryo‘lda kapital ta’mirlash ishlari olib borilishi munosabati bilan, 2021-yil 6-sentyabr kuni soat 7:28 da Toshkent — Buxoro yo‘nalishida qatnovini amalga oshiradigan 762-sonli «Afrosiyob» yuqori tezlikda harakatlanuvchi poyezdining harakat jadvalida bir martalik o‘zgarish bo‘ladi. Bu haqda «Oʼztemiryoʼlyoʼlovchi» AJ xabar berdi.

«Unga ko‘ra mazkur poyezd shu kuni Toshkentdan Navoiygacha harakatini amalga oshiradi. Yo‘lovchilar Navoiydan Buxorogacha «O‘zbekiston temir yo‘llari» AJ tomonidan tashkil qilinadigan maxsus avtobuslarda olib boriladi.

Joriy yil 6 sentyabr kuni Buxoro — Toshkent yo‘nalishida qatnovini amalga oshiradigan 761-sonli «Afrosiyob» yuqori tezlikda harakatlanuvchi poyezdi o‘z vaqtida harakatini amalga oshiradi. Shuningdek, boshqa poyezdlar harakat jadvalida ham o‘zgarish bo‘lmaydi.

«O‘zbekiston temir yo‘llari» AJ rahbariyati bunday noqulaylik uchun yo‘lovchilardan uzr so‘raydi.

Izoh: Qo‘shimcha ma’lumotlarni Toshkent shahrida 1005 qisqa telefon raqami, joylardagi temir yo‘l kassalari hamda ma’lumotlar byurosidan bilib olishingiz mumkin» deyiladi ma’lumotda.