Ayni vaqtda Toshkent Xalqaro investitsiya forumi bo‘lib o‘tmoqda. Ushbu forumda prezident Shavkat Mirziyoyev ishtirok etmoqda.

Yig‘ilish davomida Saudiya Arabistoni investitsiya vaziri Xolid al-Falih nutq so‘zladi va o‘z fikrlarini bildirdi.

Hamkorlik haqida

O‘zbekiston bilan hamkorligimiz yil o‘tgani sari rivojlanib bormoqda.

Biz nafaqat birga iqtisodiyotni rivojlantiramiz, biz kelajakni birgalikda yaratamiz.

Men 2016 yilda ham yurtimizga kelganman. O‘sha vaqtdagi vaziyatni gapirmoqchi emasman, aytmoqchimanki, o‘tgan vaqt davomida erishilgan barcha yutuqlar sizning nomingiz bilan bog‘liq, janob Prezident.

Buyuk ipak yo‘li haqida

O‘zbekiston Buyuk Ipak yo‘lining chorrahasida joylashgan va dunyo ilm-fani rivojiga katta ta’sir ko‘rsatgan. Biz — arab davlatlari ham Buyuk Ipak yo‘lining bir qismida bo‘lganmiz. Bizning aloqalarimiz tarixiydir.
Albatta xozirda yuk tashish asosan havo yo‘llari orqali amalga oshirilmoqda. Ammo quruqlikdagi ipak yo‘li ham yangi bosqichga kirib bormoqda. Biz mana shu hamkorlikda faol ishtirok etishni istaymiz.

O‘zbeklar — mehnatsevar xalq

O‘zbeklar juda mehmondo‘st va shu bilan birgalikda juda mehnatsevar xalq. Buning tasdig‘ini shunda ham ko‘rsa bo‘ladiki, o‘zbeklar nafaqat shu yerning o‘zida, balki qo‘shni davlatlarda ham ishlamoqda. Bunday xalq bor joyga sarmoya kiritishni hamma istaydi.

Oziq-ovqat xavfsizligi haqida

Xozirda O‘zbekiston bilan energiya sohasidagi faol hamkorlik olib bormoqdamiz. Ammo buning o‘zi yetarli emas. Biz qayta tiklanuvchi energiya resurslardan tashqari yana ko‘plab loyihalar — qishloq xo‘jaligi, oziq-ovqat ishlab chiqarish va boshqa sohalarga investitsiya kiritishga tayyormiz.

Oziq-ovqat xavfsizligi ayni vaqtda butun dunyo uchun muhim vazifa. Boshqa qit’alar tugul, hatto Yevropa uchun ham oziq-ovqat taqchilligi tahdidi mavjud. Buning oldini olish esa sohaga ilg‘or texnologiyalarni olib kirishdan iborat. O‘zbekiston bu borada katta potensialga egadir.

Yangi sohalar haqida

Ayni vaqtda O‘zbekistonda sog‘liqni saqlash sohasida katta o‘zgarishlar bo‘lmoqda. Biz bu sohaga raqamli texnologiyani joriy etishda qatnashmoqchimiz.

Tog‘-kon sohasida ilg‘or texnologiyalarni O‘zbekistonga olib kelishni istaymiz. Bu albatta iqtisodiyotga ijobiy ta’sir ko‘rsatadi.

Eng asosiysi, janob prezident aytganlaridek kichik va o‘rta biznesni rivojlantirishda ishtirok etishni istaymiz. Aytaylik, yuz ming dollarlik loyihaga ham mikroqarz sifatida mablag‘ ajratish mumkin.

Bularning hammasi hamkorligimizning boshlanishidir. Biz katta yutuqlarga erisha olishimizga ishonamiz.