Keyingi vaqtlarda odamlar orasida pul almashishi mumkinligi va inflyasiyaning kuchayib borayotgani haqidagi mish-mishlar paydo bo‘ldi. Aslida qachon va qanday vaziyatlarda davlat puli o‘zgarishi mumkin? Agar shunday ehtimol bo‘lsa, odamlar qancha vaqt oldin xabardor etiladi? Narx-navoning o‘sish tendensiyasi, inflyasiya darajasi borasidagi fikrlarni mutaxassislar qanday izohlaydi?

Ushbu savollarga Milliy matbuot markazida O‘zbekiston Markaziy banki hamda «Qishloqqurilishbank»ning qo‘shma anjumanida mutaxassislar javob berdi. Bu haqda «O‘zA» xabar bermoqda.

— Pulning almashishiga sabab ham ehtimol ham yo‘q, — deydi mutaxassis. — Yo‘qsa, 100 ming so‘mlik banknotlar chiqarilarmidi? Yaqinda ana shunday summadagi pul muomalaga kiritiladi. To‘g‘ri, inflyasiya o‘sishi mumkin. Chunki bankning qayta moliyalash stavkasining ikki foizga oshirilishi, o‘z-o‘zidan bozordagi narx-navoga ta’sir qiladi.

Tadbirkor kredit olgan bo‘lsa, endi oshgan ikki foizni qoplash uchun ishlab chiqarayotgan mahsulotini bahosini balandlashtiradi.

Prezident Shavkat Mirziyoyev barcha mansabdor shaxslar tomonidan aholiga real holatni va haqiqiy statistika ma’lumotlarni yetkazib berish bo‘yicha qat’iy topshiriq bergan. Guvohi bo‘layotganimizdek, O‘zbekistonda inflyasiya yashirilayotgani yo‘q.

Narxlarning o‘sish tendensiyasi e’lon qilinmoqda, unga ko‘ra joriy yilda ham inflyasiyaning darajasi yuqori bo‘lishi kutilmoqda. Ta’kidlash kerakki, narxlarning bozor mexanizmlari asosida shakllantirish kelgusi davrlarda inflyasiya «jilovini» tortib turish imkonini berishi tabiiydir.

Mish-mishlar odamlarga qaysidir ma’noda ogohlik va profilaktika chorasidek ta’sir qilishi mumkin. Biroq iqtisodiy-moliyaviy va bank tizimida mish-mishlarga emas rasmiy bayonotlarga tayangan ma’qul.

Qayd etish joizki, yaqin orada so‘mning qadri oshishi kutilmoqda. Xususan, yalpi ichki mahsulotga teng miqdorda mablag‘imiz bo‘lganda uning qadrsizlanishi to‘xtaydi. Yana investitsiya kiritish hajmining oshishi ham pul qadrini oshiradi.

Eslatib o‘tamiz, Milliy matbuot markazida bo‘lib o‘tayotgan O‘zbekiston Markaziy banki hamda «Qishloqqurilishbank»ning qo‘shma anjumanida mutaxassislar O‘zbekistonda dollar kursining «o‘ynashi»ga nima sabab bo‘layotganiga ham izoh berishgandi.