Ayni daqiqalarda Xalqaro press-klubda «Budjet-2018: xalq manfaatlari, aniq ko‘rsatkichlar va yangi yondashuvlar» mavzusida matbuot anjumani bo‘lib o‘tmoqda. Unda xalqaro va mahalliy ekspertlar, respublikamizdagi moliya tashkilotlari rahbarlari ishtirok etmoqda.

Tadbir qatnashayotgan Sherzod Qudratxo‘jayevning ta’kidlashicha, «chet elda hamma moliyaviy masalalar fuqarolarning kredit tarixiga qarab amalga oshiriladi. Shu bois bugungi kunda rivojlangan davlatlarda har bir kishining o‘z kredit tarixi bor. Bizda endi-endi kirib kelyapti».

«Kredit axborot-tahliliy markazi» kredit byurosi direktori Muzaffar Salomovning ma’lum qilishicha, bizda banklar va boshka kredit tashkilotlari kredit tarixi ma’lumotlarini kredit byurosiga taqdim etish majburiyati qonun darajasida belgilab qo‘yilgan. Kredit tarixiga nafaqat kreditlar, hatto gaz-elektr energiyasi kabi kommunal to‘lovlar bo‘yicha qarzdorliklar kiritiladi.

O‘z navbatida Xalqaro moliya korporatsiyasining kredit hisobotlarini rivojlantirish bo‘yicha eksperti Fabritsio Fraboni ham «Men o‘z davlatimda 5 daqiqa ichida kredit olishim mumkin. Faqatgina kredit tariximda muammo bo‘lmasa, kifoya», — deya qo‘shimcha qilgan.