Aytishlaricha, mamlakatda «ixcham Hukumat»ni shakllantirish bo‘yicha sa’y-harakatlar boshlangan. Shu kunlarda hukumat tarkibida, shuningdek, markaziy vazirlik hamda idoralar rahbariyatida qator o‘zgarishlar yuz berishi kutilmoqda. Bu haqda telegramdagi «davletovuz» kanali xabar tarqatdi.

Unga ko‘ra, O‘zbekiston Respublikasi Prezidenti maslahatchisi o‘rinbosari Elyor G‘aniyev Bosh vazirning investitsiyalar va tashqi iqtisodiy aloqalar masalalari bo‘yicha o‘rinbosari etib tayinlangan.

O‘zbekiston Respublikasi Bosh vazirining o‘rinbosari — O‘zbekiston Respublikasi Investitsiyalar bo‘yicha davlat qo‘mitasi raisi Suhrob Xolmurodov egallab turgan lavozimidan ozod qilingan. U boshqa lavozimga o‘tkazilgan.

Qishloq xo‘jaligi vaziri Bahodir Yusupov ham lavozimidan ozod qilingan.

Tashqi savdo vaziri Jamshid Xo‘jayev qishloq xo‘jaligi vaziri etib tayinlangan.

Investitsiyalar bo‘yicha davlat qo‘mitasi va Tashqi savdo vazirligi qo‘shilib, yagona vazirlikka aylantirilgan. Investitsiyalar va tashqi savdo (vazirlik nomiga aniqlik kiritiladi) vaziri etib «O‘zcharmsanoat» uyushmasi raisi Sardor Umurzoqov tayinlangan. Sunnatulla Bekenov, Laziz Qudratov, Shuhrat Vafoyev, Badriddin Abidov yangi vazirga o‘rinbosar bo‘lgan.

Hozircha bu xabarlar rasmiy tasdiqlangani yo‘q. Ushbu tayinlovlarga yaqin vaqt ichida aniqlik kiritamiz.