Kecha ijtimoiy tarmoq va veb-saytlar navbatdagi xabardan yaxshigina silkinib oldi: taniqli estrada xonandasi voyaga yetmagan qizning nomusiga tegdi, biroq IIB uning harakatlarida jinoyat alomatlari yo‘q deb, topdi!

Inson sha’ni va qadr-qimmatiga oid o‘ta shaxsiy masalalarga oid bunday xabarlar jamoatchilik e’tiborini chandon tortishi tabiiy. Munosabatlar ham shunga yarasha deng... Shu boiski, kechadan buyon shov-shuvlar tinayotgani yo‘q. E’tiborlisi, xonandaning o‘zi ham «voqelik ro‘y berganini» tamoman inkor etmaydi, ammo «hammasi tomonlarning xohish-ixtiyori ila ro‘y bergan»!

Masalaga ma’naviy-axloqiy nuqtai nazardan qaralsa, xonandaning gaplari «e, basharang qursin?!» deyish uchun yetib ortadi, albatta. Biroq holat huquqiy me’yorlardan kelib chiqib baholanadiki, yoqsin-yoqmasin, Bosh prokuraturaga so‘rov yuborishga to‘g‘ri keldi: «delo» tamomila yopildimi endi?

Mahkama matbuot xizmatining «Xabar.uz»ga bildirishicha, «nomusga tegish ishi» nazoratda, IIB tergovchisining bu boradagi qarori qonuniyligi Samarqand viloyat prokuraturasi tomonidan o‘rganilmoqda.