23-iyun kuni soat 23:45 da 22 yoshli S.A. boshqaruvidagi «Nexia» rusumli avtomashinasida «Qo‘qon-Buvayda» avtomobil yo‘li bo‘ylab harakatlanib, Uchko‘prik tumani «Kaltatoy» qishlog‘i hududiga yetib kelgan vaqtida, noma’lum shaxslar kul rangli «Nexia-1» bilan to‘sib to‘xtatishadi.

IIV huzuridagi Tergov departamenti axborot xizmati xabar berishicha, yo‘lto‘sarlar  avtomashina salonida bo‘lgan 36.700.000 so‘m pul hamda bahosi 1.600.000 so‘mlik «Redmi-7» rusumli telefonni ochiqdan-ochiq talon-toroj qilib, hodisa joyidan yashirinishgan.

Olib borilgan tezkor surishtiruv ishlari davomida mazkur jinoyatni 32 yoshli M.A., 24 yoshli  J.J., 21 yoshli J.Yu. va M.U. (ayol) lar sodir etganliklari aniqlanib, J.J. dan «Redmi-7» rusumli uyali aloqa vositasi ashyoviy dalil tariqasida olingan.             

Mazkur holat yuzasidan Uchko‘prik tumani IIB huzuridagi Tergov bo‘limi tomonidan Jinoyat Kodeksining 166-moddasi 2-qismi «b,v» bandlari (talonchilik) bilan jinoyat ishi qo‘zg‘atilgan. Jinoyatni sodir etgan barcha shaxslar gumon qilinuvchi tariqasida ishda ishtirok etishga jalb qilingan. Hozirda dastlabki tergov harakatlari olib borilmoqda.