Kecha Jahon chempionatining ikki chorak finalchisi aniq bo‘lgan edi. Bugun, 1-iyul kuni mundialning nimchorak final uchrashuvlari davom ettiriladi.

Kunning dastlabki bahsida Rossiya va Ispaniya g‘oliblik uchun kurash olib boradi. Rossiya o‘z tarixida birinchi marta pley-offga chiqdi. Garchi guruhning dastlabki ikki o‘yinini yorqin o‘tkazgan bo‘lsa-da, birinchi duch kelgan raqib – Urugvayga mag‘lub bo‘ldi. Ispanlar munialni mag‘lubiyatsiz davom ettirmoqda. Umuman olganda ispanlar salkam ikki yil davomida 23 o‘yindan beri yutqazmayapti. Lekin bu JChda Ispaniyaning o‘yini mukammal emas, bu birinchi navbatda bosh murabbiyning JCh boshlanishi arafasida bo‘shatib yuborilishi bilan bog‘liq. Shunday ekan Rossiyada ham imkoniyat bor. O‘yin Toshkent vaqti bilan soat 19:00da boshlanadi.

Ispaniya – Rossiya

1-iyul. «Lujniki» stadioni. 19.00.

Taxminiy tarkiblar

Ispaniya: David De Xea — Dani Karvaxal, Jerar Pike, Serxio Ramos, Jordi Alba — Serxio Buskets, Koke, Andres Inesta, Isko — Diyego Kosta, Yago Aspas.

Rossiya: Igor Akinfeyev — Mario Fernandes, Ilya Kutepov, Sergey Ignashevich, Yuriy Jirkov — Roman Zobnin, Daler Kuzyayev; Aleksandr Samedov, Aleksandr Golovin, Denis Cherishev — Artem Dzyuba

Hakamlar: Kaypers, van Rukel, Zaynstra (barchasi – Gollandiya).

Kun ikkinchi o‘yinida chempionatni juda ishonchli o‘tkazayotgan Xorvatiya Daniyaga qarshi o‘ynaydi. Guruh bahslaridan so‘ng xorvatlar ham mundial favoritlaridan biriga aylanib olishdi. Ammo ularga bugungi o‘yinda oson bo‘lmaydi. Daniya so‘nggi 18 o‘yindan beri mag‘lubiyat nimaligini bilmay kelmoqda (9 g‘alaba, 9 durang). FIFA reytingida ham ular xorvatlardan yuqorida. Shunday ekan, bu juftlikda kimnidir oldindan hisobdan chiqarib bo‘lmaydi.

Xorvatiya – Daniya

1-iyul. «Nijniy Novgorod» stadioni. 23.00.

Taxminiy tarkiblar

Xorvatiya: Daniel Subashich — Shime Vrsalko, Deyan Lovren, Domagoy Vida, Ivan Strinich — Ivan Rakitich, Milan Badel — Ante Rebich, Luka Modrich, Ivan Perishich — Mario Mandjukich

Daniya: Kasper Shmeyxel — Yens Stryuger Larsen, Andreas Kristensen, Simon Ker, Xenrik Dalsgor — Lasse Shene, Tomas Dileyni, Kristian Eriksen, Pione Sisto, Nikolay Yorgensen — Yussef Poulsen

Hakamlar: Pitana, Maydana, Belatti (barchasi – Argentina).