O‘zbekiston Respublikasi IIV YHX Bosh boshqarmasi O‘zbekistonda avtomobil raqamlari xalqaro raqamlarga almashtirilishi haqida tarqalgan xabarlarni rad etdi.

«Bugun, 20-aprel kuni internet nashrlarida va ijtimoiy tarmoqlarda avtomototransport vositalari uchun amaldagi davlat raqam belgilari almashtirilishi to‘g‘risida turli ma’lumotlar tarqaldi.

Yuqoridagilarga asoslanib quyidagilarni ma’lum qilamiz.

Ma’lumki, O‘zbekiston Respublikasi Vazirlar Mahkamasining 2017-yil 2-martdagi «Milliy haydovchilik guvohnomasining hamda avtomototransport vositasi ro‘yxatdan o‘tkazilgani to‘g‘risidagi guvohnomaning yangi namunalarini joriy etish chora-tadbirlari to‘g‘risida»gi 116-sonli qaroriga asosan avtomototransport vositasi ro‘yxatdan o‘tkazilgani to‘g‘risidagi guvohnomalarni ro‘yxatdan o‘tkazish va hisobga olish tizimiga zamonaviy axborot-kommunikatsiya texnologiyalarini joriy etishni samarali tashkil etish maqsadida 2017 yilning oktyabr oyidan avtomototransport vositasi ro‘yxatdan o‘tkazilgani to‘g‘risidagi guvohnomaning yangi namunasi joriy etildi. 

Bundan tashqari, O‘zbekiston Respublikasi Vazirlar Mahkamasining 2007-yil 27-iyundagi «Avtomototransport vositalari uchun ro‘yxatdan o‘tkazish davlat raqam belgilarining yangi namunalarini joriy etish chora-tadbirlari to‘g‘risidagi» 131-sonli qaroriga asosan hozirgi kunda amalda bo‘lgan avtomototransport vositalari uchun milliy davlat raqami belgilarining xalqaro talablar va standartlarga muvofiqligini ta’kidlash joiz.

O‘zbekiston Respublikasi Prezidenti tomonidan joriy yilning 18-aprel kuni tasdiqlangan PQ-3673-sonli «Investitsion loyihalarni amalga oshirish va idoraviy axborot tizimlari jadal integratsiyalashuvining tashkiliy chora-tadbirlari to‘g‘risida»gi qaroriga asosan transport vositalariga tegishli qog‘oz hujjatlarni, ushbu hujjatlardagi barcha ma’lumotlarni transport vositalari egalarining ID-kartalariga kiritgan holda bekor qilish, amaldagi davlat raqam belgilarini xalqaro namunadagi davlat raqam belgilariga almashtirishni ko‘zda tutuvchi, transport vositalarini hisobga olish tizimini yaratish bo‘yicha tegishli vazirlik va idoralarning taklifi ma’qullangan. Bundan ko‘rinib turibdiki, respublikamiz hududida transport vositalarini hisobga olish tizimini yaratish, ushbu sohaga axborot-kommunikatsion texnologiyalarni joriy etish bo‘yicha bosqichma-bosqich faoliyat olib borilmoqda. 

O‘zbekiston Respublikasi Prezidentining qarorida esa faqatgina transport vositalarini hisobga olishning zamonaviy tizimini yaratish haqida so‘z yuritilmoqda», deyilgan O‘zbekiston Respublikasi IIV YHX Bosh boshqarmasining «Kun.uz»ga yo‘llagan rasmiy javobida.