Filippinda bo‘layotgan voqealarni har xil talqin qilish mumkin. Prezident Rodrigo Duterte giyohvandlik, korrupsiya va boshqa jinoyatlarga qarshi keskin kurash usullari bilan xalqaro hamjamiyatga yaxshi tanish.

Ayniqsa 2016-yildan, prezident bo‘lib saylanganidan so‘ng, u jinoyatchilikka, jumladan avtomobillar noqonuniy importiga qarshi rosmana urush ochdi.

Filippin hukumati 2016-yilga qadar mamlakatga noqonuniy yo‘llar bilan kirib kelgan mashinalarni musodara qilib sotar va budjetga pul tushirardi. Dutertening nazarida esa esa harom yo‘llar bilan topilgan pullar o‘z-o‘zidan halol bo‘lib qolmaydi: avtomobillar yo‘q qilinishi kerak, tamom vassalom.

Quyidagi videoga e’tibor bering: Duterte yordamchilari bilan yo‘q qilinishi kerak bo‘lgan avtomobillarni ko‘rib chiqyapti — «Lamborghini», «Ford Mustang», «Porsche» va mototsikllar, pulga chaqilsa 5,89 million dollar bo‘ladi. Keyin hamma kaskalarni kiyib, himoya ko‘zoynaklarini taqishdi va buldozerni mashinalar ustiga haydashga buyruq berildi.