Ёшлар ишлари агентлиги, Ёшлар иттифоқи ва Лойиҳалар бошқаруви маркази ҳамкорлигида Сунъий интеллект ҳамжамияти ташкил этилди.

Сунъий интеллект имкониятларини муҳокама қилиш, лойиҳалар яратиш ва уни ривожлантириш бўйича иш олиб борувчи ҳамжамиятнинг ташаббускори ёш стартапчи Улуғбек Исматовдир. Ушбу ҳамжамият эса юртимиздаги ана шундай сунъий интеллектларни турли соҳаларда татбиқ этиш ва уларни халқаро бозорга олиб чиқишга кўмаклашишни мақсад қилган.

Сунъий интеллект ҳамжамиятининг дастлабки йиғилишида «TASS-VISION», «AXON.COM» мисолидаги лойиҳалар муҳокама қилинди. Бундан ташқари, лойиҳа бошқарувчисини танлаш жараёни бўлиб ўтди. Эндиликда ҳар ой ушбу ҳамжамият томонидан соҳага доир учрашувлар ўтказилиб борилади. Шунингдек, халқаро ташкилотлар ва юртимиздаги ахборот технологиялари йўналишидаги ташкилотлар билан ҳамкорликни йўлга қўйиш ва сунъий интеллектга асосланган технологияларни маҳаллий бозорда жорий этиш бўйича иш олиб борилади.

Шаҳноза Нуриллаева