Тошкент ахборот технологиялари касб-ҳунар коллежида «АКТ конвергенцияси» ва «Электрон бизнес» йўналишларида ўзбек-корейс факультети очилади. Лойиҳа Тошкент ахборот технологиялари КҲК ва Корея Республикасининг Улсан коллежи ҳамкорлигида йўлга қўйилмоқда.

Тошкент ахборот технологиялари КҲК да эртага, 20 сентябрь куни бўлиб ўтадиган тақдимотда янги факультет ҳақида батафсил маълумот берилади.

Коллеж директори Дмитрий Лининг айтишича, қўшма таълим ҳақидаги меморандум 2018 йилнинг 1 августида имзоланган эди. Ҳамкорлик алоқалари олдиндан ривожланиб келган.

Янги факультетга коллеж биносининг олтинчи қавати ажратилган. Таъмирланиб, кераклича жиҳозланган. Қурилмаларни кореяликлар етказиб беришди. Ташқи кўриниши ва таъминланиши жиҳатидан ўзбек-корейс факультети Улсан коллежи факультетлари билан бир хил.

Қўшма таълим икки босқичли таълимни кўзда тутади. Ўзбек-корейс факультети ўқувчилари биринчи йил Тошкентда ўқишади: махсус фанларни ўзлаштириб, корейс ва инглиз тилларини чуқурлаштирилган ҳолда ўрганишади.

Биринчи курсни тугатган ўқувчиларга маҳаллий коллежларники билан бир диплом берилади. Иккинчи курсга аъло даражада ўтган ўқувчилар ўқишни Жанубий Кореяда, ҳамкор коллежда давом эттиришади.

У ердаги коллежни ҳам тугатишгач, уларга халқаро андозалардаги диплом берилади. Бу диплом хоҳловчиларга Улсан университети ёки Кореядаги исталган олий ўқув юртининг бакалавриати учинчи курсига кириш имконини беради.

Янги факультетдаги мутахассисликлар ҳам янги — ўқув дастурлари Улсан коллежи ўқув-методикаси асосида ишлаб чиқилган.

Таълим шакли — шартнома асосида. 2018 йили янги факультетга Тошкент ахборот технологиялари КҲК ва бошқа турдош коллежларнинг битирувчилари қабул қилинади. Шунингдек, иккинчи касбга ўқишни истаган ўрта махсус ва олий маълумотга эга шахслар ҳам янги факультетга кириб ўқишлари мумкин.

Тақдимот куни меҳмонлар янги факультетнинг аудиториялари ва лабораториялари билан таништирилади.