«Атлетико» футболчилари 8 майдаги (бизнинг вақт билан 9 майга ўтар кечаси соат 00:00 да «Ванда Метрополитано»да бошланади) Мадрид дербиси аввалида «Реал» учун «чемпионлик йўлаги» очиш ниятида эмас, деб ёзди «Marca».

«Реал»нинг муддатидан аввал чемпионликка эришгани шарафига «фахрий йўлак» очишга эндиликда собиқ чемпионга айланган деярли ҳар бир атлетикочи, қолаверса, «рохибанкос»нинг кўп минг сонли мухлислари қарши.

Инсайдерлар хабарига кўра, фақат битта ҳолатда атлетикочилар ҳамшаҳарларини ғалаба билан табриклашлари мумкин — жамоа раҳбарияти футболчиларни шунга ундаса.

«Чемпионлик йўлаги» — испан футболидаги ўзига хос анъана, муайян турнирда муддатидан аввал ғалаба қозонган жамоани кейинги ўйинларда рақиб жамоалар футболчилари яшил майдонга кираверишда икки қатор бўлиб тизилиб кутиб олишади ва табриклашади. Бироқ ашаддий рақиблар, масалан, юқоридаги Мадрид дербиси ёки «Реал» ва «Барселона» ўртасидаги ўйинларда бу анъана бузилиши одатий ҳолат.