Аввал хабар берганимиздек, Ўзбекистон Республикаси Президенти Шавкат Мирзиёевнинг таклифига биноан Туркия Республикаси Президенти Ражаб Тоййиб Эрдўғон кеча, 29 апрель куни давлат ташрифи билан Ўзбекистонга келган эди.

Бугун, 30 апрель куни Тошкент шаҳридаги Кўксарой қароргоҳида Туркия Президенти Ражаб Тоййиб Эрдўғонни расмий кутиб олиш маросими бўлиб ўтди.

Икки давлат мадҳиялари янгради. Сўнгра Президентлар ҳукумат аъзолари, дипломатик корпус вакиллари билан танишдилар.

Қуйида ушбу репортажни кўришингиз мумкин.

Эслатиб ўтамиз, ташриф доирасида Тошкент шаҳрида кўп қиррали ҳамкорликни янада мустаҳкамлаш йўллари, икки томонлама муносабатларнинг янги истиқболларини белгилаш ва ривожлантиришни муҳокама қилиш режалаштирилган. Минтақавий ва халқаро аҳамиятга молик, жумладан, глобал ва минтақавий хатар ва таҳдидларга қарши курашиш масалаларига алоҳида эътибор қаратилади.

Шунингдек, Туркия Президенти Ўзбекистон Республикаси Олий Мажлиси палаталарининг қўшма мажлисида сўзга чиқади. Президентлар Ўзбекистон ва Туркиянинг етакчи банклари, компания ва фирмалари раҳбарларининг қўшма бизнес форумида ҳам иштирок этади.

Ташриф дастуридан Туркия делегациясининг Бухоро шаҳрида бўлиши ҳам ўрин олган.

Ўзбекистон – Туркия музокаралари якунида Президентлар икки томонлама муносабатларнинг жорий ҳолати ва уни жадал ривожлантириш масалалари акс этган Қўшма баёнотни имзолаши режалаштирилган.

Ташриф доирасида давлатлараро, ҳукуматлараро ва идоралараро турли соҳаларга оид салмоқли ҳужжатлар тўплами ҳамда қатор инвестиция келишувлари имзоланиши кутилмоқда.