АҚШ Ижтимоий таъминот бошқармаси ҳужжат бўйича ғайритабиий ёшларда «яшаётган», ҳатто айримлари 120 ёшдан ошган 7 миллионга яқин америкаликни ўлган деб эълон қилди.

Бу ҳақда Илон Маск бошчилигидаги Ҳукумат самарадорлиги департаменти (DOGE) маълум қилди. 

«Охирги уч ҳафта ичида Ижтимоий таъминот бошқармаси ўз маълумотлар базаларида катта тозалаш ишларини олиб борди. 120 ёшдан ошган 7 миллионга яқин америкалик ўлган деб белгиланди. Ҳали яна 5 миллионга яқини қолган», – дейилади ҳисоботда.

Ҳужжатларда қайд этилган 1,7 миллион нафар 120-129 ёш оралиғидаги, 2,4 миллион нафар 130-139 ёш оралиғидаги, 2,4 миллион нафар 140-149 оралиғидаги, ҳатто 400 мингдан ортиқ 150 ёшдан ошган америкалик учун ижтимоий нафақалар тайинлаб келинган.

Феврал ойида DOGE бошлиғи Илон Маск америкаликларнинг ижтимоий нафақа олиш ёшига эътибор қаратган эди. У эълон қилган графикага кўра, Қўшма Штатларда 100 ёшдан ошган 4 миллиондан ортиқ фуқаро бор. Маск мамлакат ижтимоий таъминот тизимини тарихдаги энг катта фирибгарлик деб атади.