«Uff.uz» сайти раҳбари Азизхон Акбаров шу кунларда Россияда жаҳон чемпионати баҳсларини ёритиб бормоқда.

А.Акбаров чемпионатга келган таниқли футболчи, «Манчестер Юнайтед» афсонаси Райан Гиггз билан суҳбатлашишга муваффақ бўлган. У суҳбат давомида Ўзбекистон миллий терма жамоасини бошқариш ҳақидаги саволга ҳам жавоб қайтарди.

Журналистнинг «Жаноб Гиггз, вақтингизни олмайман, охирги саволим. Ўзбекистон футболи ҳақида эшитмаган бўлсангиз керак-а? Агар сизбоп маош таклиф қилишса, бизнинг юртда ишлармидингиз?», — деган саволига у қуйидагича жавоб қайтарди:

— Бир жуда тўғри айтилган ибора бор: ҳеч қачон «ҳеч қачон» дема. Мамлакатингиз футболи ҳақида кўп нарса билмайман. Юртингизда ишлашга келсак: сиз мураббий сифатида деяпсиз-да?

— Ҳа, миллий термамиз бош мураббийи бўлармидингиз?

— Ўйлашимча, Ўзбекистонда ишлашимгача қўйишмаса керак. Буюк Британиянинг ўзида ўнлаб таклифлар олганман ва олаяпман. Балки, келажакда Осиё футболида ишларман. Жумладан, сизнинг юртингизда ҳам. Фақат бунинг учун жуда кўп нарсалар бир-бирига мос келиши керак. Демоқчиманки, бу ерда гап пулда эмас. Шароит, муносабат, ишга билмасдан туриб аралашавериш ва ҳоказо кўп жиҳатлар бор.