Украина президенти Владимир Зеленский Оқ уйнинг Овал кабинетидаги воқеа учун Доналд Трампдан кечирим сўради. Бу ҳақда АҚШ президентининг махсус элчиси Стив Уиткофф Fox News телеканали эфирида маълум қилди.

«Овал кабинетда юз берган воқеа учун Зеленский кечирим сўраб Трампга хат йўллади», — деди Уиткофф.

28 феврал куни Зеленский ва Трампнинг Оқ уйдаги учрашуви шов-шувга айланганди. Трамп Зеленскийнинг кўрсатилган ҳарбий ва иқтисодий кўмак учун миннатдорлик билдирмай ҳурматсизлик кўрсатганини таъна қилган, қолаверса, ўт очишни тўхтатишга розилик бермаётгани учун танқид қилганди. Учрашув охирига етмасдан, Украина делегациясидан Оқ уйни тарк этиш сўралган, нодир металлар бўйича келишув имзоланмай қолганди.

Кейинчалик Зеленский Оқ уйда бўлган воқеадан афсусда эканини маълум қилиб, АҚШ билан муносабатларни, жумладан, тинчлик бўйича ҳамкорликни йўлга қўйиш хоҳишини билдирганди.

Оқ уйдаги воқеага қарамасдан, Доналд Трамп Украина билан нодир металлар бўйича келишувга эришиш ниятида қатъий эканини айтганди.