Россия Ташқи ишлар вазири ўринбосари Александр Грушко «Известия» газетасига катта интервью берди.

Унда, жумладан, Украинада тинчлик ўрнатиш масаласидаги саволлар ҳам кўтарилган.

Александр Грушко Россия томонининг 2021 йилдаги АҚШ ва НАТОга хавфсизлик кафолатлари бўйича киритган таклифи ҳамда айни пайтда Вашингтон билан олиб борилаётган музокараларда НАТОни 1997 йилги чегараларга қайтариш масаласи муҳокама қилинаётгани ёки йўқлиги ҳақидаги масалаларга тўхталган.

«2021 йилда Россия Федерацияси иккита ташаббусни илгари сурди. Бири АҚШга, иккинчиси НАТО давлатларига қаратилган эди. Аммо улар қўллаб-қувватланмади. Биз ҳамкорларимиз деб аталувчи давлатлар мазмунли мулоқотга тайёр эмаслигини англадик. Альянснинг ҳарбий қурилиши табиати ва АҚШнинг ҳарбий тайёргарликлари Россиядан устунликка эришишга қаратилганлиги аниқ бўлди. Бундан ташқари, , Россияга қарши асосий жанг майдони, ҳарбий амалиётлар театри сифатида Украина танланган», – дейди у.

Грушко, шунингдек, Украинадаги можарони тинч йўл билан ҳал қилишнинг ташқи омиллари борлиги, Россия томони тинчлик келишувига қатъий белгилаб қўйилган хавфсизлик кафолатлари эвазига рози бўлишини таъкидлайди.

«Чунки мазкур шартларнинг қарор топиши билангина Украинада мустаҳкам тинчликка эришиш ва умуман минтақавий хавфсизликни мустаҳкамлаш мумкин бўлади. Ушбу кафолатларнинг бир қисми – Украинанинг нейтрал мақоми ва НАТО давлатларининг уни альянс аъзоси сифатида қабул қилишдан бош тортиши керак.

Муҳокамаларга келсак, албатта, улар бугун олиб борилмаяпти, чунки ҳеч қандай музокараларнинг ўзи йўқ», – дейди Александр Грушко.