Доналд Трампнинг олдиндан айтиб бўлмас сиёсати юзасидан хавотирлар туфайли, Германия АҚШ федерал захира тизими омбори сақланаётган 1 200 тонна олтинини олиш имкониятларини ўрганмоқда. Bild ёзишича, АҚШнинг импорт божлари жорий этганидан кейинги янги ташқи иқтисодий курси бу масаланинг юзага чиқишига туртки бўлди.

Айни пайтда Германиянинг кейинги ҳукуматига раҳбарлик қилиши эҳтимоли юқори бўлган Христиан-демократик иттифоқнинг юқори мартабали амалдорлари Ню-Йоркдан олтинни қайтариш имкониятини муҳокама қилмоқда.

Шу билан қаторда, Германиянинг ушбу қадами нафақат мамлакат, балки жаҳон молиявий манзараси учун қандай оқибатларни олиб келиши кўпчиликни жиддий ташвишлантирмоқда.

Олтин захиралари миллий бойлик ва молиявий хавфсизликнинг муҳим таркибий қисмидир. Ҳукуматлар кўпинча олтинни инфляция ва валюта курсининг ўзгаришига қарши ҳимоя воситаси сифатида кўришади.

Германия Иккинчи жаҳон урушидан кейин экспортни кўпайтириш орқали олтин тўплади, бу эса катта савдо профицитига олиб келди. Жамғарма Бреттон-Вудс валюта тизими доирасида олтинга айлантирилган.

Ню-Йоркда сақланаётган Германия олтин захираси қиймати 113 миллиард еврога баҳоланмоқда, бу мамлакат олтин захираларининг қарийб 30 фоизини ташкил қилади.

Нашр суҳбатлашган экспертлар Вашингтон немис олтинини беришига шубҳа билдиришди. АҚШдан нафақат немислар, балки бошқа мамлакатлар ҳам ўз олтинини олиши даргумон. Немис сиёсатчилари қимматбаҳо метални қайтаришни талаб қилишдан олдин шуни ёдда тутганлари маъқул, дейишди экспертлар.

Эслатиб ўтамиз, айни пайтда олтиннинг бир унцияси (28,3 грамм) қиймати 3 150 АҚШ долларидан ошиб, рекорд натижа қайд этилди. Доналд Трамп импорт божлари тарифларини оширганидан сўнг олтин қимматлашиши янада тезлашди.