O‘zbekistonda bolalar o‘limi haqidagi xabarlardan so‘ng Qirg‘izistonda ham «Doc-1 Max» preparati savdosi to‘xtatildi. Bu haqda mamlakat Dori vositalari va tibbiy asboblar bilan ta’minlash departamenti ma’lum qildi.

Mazkur nomdagi tabletka va sirop savdosi bugun, 23-dekabrdan to‘xtatilgan.

«Doc-1 Max» preparati kombinatsiyalangan dori vositasi bo‘lib, u isitma, bosh og‘rig‘i, tomoq og‘rig‘i, samarali yo‘tal bilan kechuvchi o‘tkir respirator virusli infeksiyalar va grippni simptomatik davolashda qo‘llanilib kelinadi. Mazkur preparat Qirg‘iziston Respublikasida 2018-yilda ro‘yxatga olingan va mamlakatga oxirgi import 2021-yilda bo‘lgan. 2022-yilda esa import qilinmagan», – deyiladi Departament xabarida.

Shuningdek, ayni paytda dori vositasi laboratoriya tahlili uchun Markaziy nazorat-tahlil laboratoriyasiga yuborilgani ma’lum qilindi.

Departament, shu bilan birga, hozircha «Doc-1 Max» preparati bilan bog‘liq noxush holatlar qayd qilinmaganini bildirdi.

Eslatib o‘tamiz, kecha, 22-dekabr kuni ijtimoiy tarmoqlarda «Doc-1 Max» dori vositasi iste’molidan Samarqanddagi shifoxonalarda bolalar o‘limi kuzatilayotgani haqida xabarlar tarqalgan edi. O‘zbekiston SSV mazkur preparatning savdosi vaqtincha to‘xtatilganini ma’lum qilgan.