Osiyoda hamkorlik va ishonch choralari bo‘yicha kengashni chaqirish tashabbusi ilk bor Qozog‘istonning birinchi Prezidenti Nursulton Nazarboyev tomonidan 1992-yil oktyabr oyida BMT Bosh Assambleyasining 47-sessiyasida e’lon qilingan edi.

Kengash a’zo davlatlari tashqi ishlar vazirlarining 1999-yil sentyabr oyida Olmaotada bo‘lib o‘tgan «muloqot forumi» sifatidagi birinchi yig‘ilishidan so‘ng rasman ish boshladi.

Kengashning asosiy maqsadlari:

- Osiyo mintaqasida tinchlik, xavfsizlik va barqarorlikni ta’minlashga oid ko‘p tomonlama yondashuvlarni ishlab chiqish orqali hamkorlikni kengaytirish;

- giyohvandlik vositalarining noqonuniy ishlab chiqarilishi va aylanishiga qarshi kurash;

- Osiyoda farovonlik va barqarorlik manfaati uchun savdo-iqtisodiy hamkorlikni kengaytirish;

- terrorizmning barcha ko‘rinish va ko‘rinishlariga qarshi kurash;

- atrof-muhitni muhofaza qilish bilan bog‘liq barcha masalalar bo‘yicha hamkorlik;

- ommaviy qirg‘in qurollarining tarqalishining oldini olish va izchil yo‘q qilish;

- gumanitar sohada ishonchni mustahkamlash chora-tadbirlarini ishlab chiqish;

- sivilizatsiyalar o‘rtasidagi munosabatlarda o‘zaro hurmat, tushunish va bag‘rikenglikni mustahkamlash;

- a’zo davlatlar o‘rtasida ishonchni mustahkamlash chora-tadbirlarini amalga oshirish.

Kengash o‘z faoliyatini davlat va hukumat rahbarlarining deklaratsiyalari, Davlat rahbarlari kengashi, Tashqi ishlar vazirlari kengashi va yuqori mansabdor shaxslar komissiyasi qarorlari doirasida amalga oshiradi.

Kengashning boshqaruv organlari Davlat rahbarlari sammiti, Tashqi ishlar vazirlari yig‘ilishi va Oliy mansabdor shaxslar qo‘mitasi hisoblanadi. Oliy organi esa davlat va hukumat rahbarlarining sammiti hisoblanadi.

Sammitlar har to‘rt yilda bir marta chaqiriladi. Uning faoliyati yig‘ilishga a’zo davlatlarning ixtiyoriy badallari hisobidan moliyalashtiriladi.

Kengashga bugungi kunda mintaqa hududi va aholisining 90 foizini qamragan 27 davlat a’zo. Sakkiz mamlakat va beshta nufuzli xalqaro tuzilma - Birlashgan Millatlar Tashkiloti, Yevropada xavfsizlik va hamkorlik tashkiloti, Arab davlatlari ligasi, Xalqaro migratsiya tashkiloti, Turkiy tilli mamlakatlar Parlament assambleyasi uning kuzatuvchilaridir.

Eslatib o‘tamiz, ayni paytda O‘zbekiston Prezidenti Osiyoda hamkorlik va ishonch choralari bo‘yicha kengash sammitida ishtirok etish uchun Ostona shahrida bo‘lib turibdi.