Isroil Eron hujumiga javob berish niyatida va AQShni rejalari haqida xabardor qiladi. Variantlar orasida Eron armiyasiga yoki respublika tashqarisidagi Tehron tomonidan qo‘llab-quvvatlanadigan kuchlarga zarba berish kiradi.

Isroil Eron hujumiga oqilona javob beradi, dedi yahudiy davlati bosh vaziri Benyamin Netanyahu, deb xabar bermoqda Kan radiosi.

«Biz Eronga javob beramiz, lekin buni intuitiv tarzda emas, aql bilan qilishimiz kerak. Ular bizni stressga duchor qilganidek,o‘zlari ham stressga tushishlari kerak», — deydi u.

Radio manbalarining aytishicha, Isroil AQSh va boshqa davlatlar qarshiligiga qaramay, javob qaytarmoqchi. «Bu faqat vaqt masalasi», — deydi manba.

Amerikaning NBC News nashri manbasi Isroilning javobini «muqarrar» deb atadi, biroq Tel-Aviv o‘z harakatlarini Vashington bilan muvofiqlashtirish niyatida ekanini ta’kidladi. Nashrning AQSh hukumatidagi manbalariga ko‘ra, Isroilning javobi ko‘lami cheklangan bo‘lishi va Eron harbiy kuchlari va respublikadan tashqaridagi Eron tomonidan qo‘llab-quvvatlanadigan tuzilmalarga qaratilgan bo‘lishi kutilmoqda.

Eslatib o‘tamiz, Eron Yaman hutiylari va Livan Hizbullohi ko‘magida 13 aprel oqshomida Isroilga hujum qilgandi.

Eron hujum paytida yuzlab raketa va dronlardan foydalangan. Amerika kuchlari Isroil armiyasiga hujumni qaytarishda yordam berdi. Ular 80 dan ortiq dron va kamida oltita ballistik raketani yo‘q qildi.

Avvalroq Isroil tomonidan Eronning Damashqdagi konsulligiga hujum uyushtirgandi. Buning oqibatida 13 kishi, jumladan Islom inqilobi qo‘riqchilari korpusining ikki yuqori martabali generali halok bo‘lgandi.