Fransiyaning eng keksa fuqarosi hayotdan ko‘z yumdi. Jyul Teobald 112 yoshda edi. Bu haqda mahalliy OAVga tayanib RIA Novosti xabar bermoqda.

Keksa fransuz dengizorti Martinika departamenti poytaxti — Fort-de-Frans shahrida istiqomat qilgan. Teobald 2019-yilda oldingi rekordchi 111 yoshli Roje Oven olamdan o‘tgach beshinchi respublikaning eng keksa fuqarosiga aylangan.

«Jyulning o‘limi bilan Martinika merosining bir qismidan judo bo‘lmoqdamiz», — dedi Fort-de-Frans keksalar masalalari bo‘yicha mas’ul Polin Dondon.

Jyul Teobald yoshligida baliqchilik qilgan, shu bois qarindoshlari uni hazillashib akula deb chaqirishardi. Rasmiy ma’lumotlarga ko‘ra, u 1909-yil 17-aprelda dunyoga kelgan. Biroq uzoq vaqtdan beri bir asr avvalgi hujjatlar to‘g‘ri saqlanganmi yoki yo‘qligi borasida tortishuvlar bo‘lmoqda. Teobald aslida 1907-yilda tug‘ilgan degan taxminlar ham bor.

Ginnesning rekordlar kitobiga ko‘ra, dunyodagi eng keksa odam ispaniyalik Saturnino de la Fuente Garsiya hisoblanadi. Yaqinda u 112 yosh 211 kunga to‘lgandi.